ମୁମ୍ବାଇ: ମହାରାଷ୍ଟ୍ରରେ ଭାଷା ବିବାଦ ତୀବ୍ର ହେବାରେ ଲାଗିଛି । ଶିବସେନା (ୟୁବିଟି) ନେତା ଏବଂ ରାଜ୍ୟସଭା ସାଂସଦ ସଞ୍ଜୟ ରାଉତ ଏହା ଉପରେ ମନ୍ତବ୍ୟ ଦେଇଛନ୍ତି । ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନଙ୍କ ବିବୃତ୍ତି ଉପରେ ପ୍ରତିକ୍ରିୟା ଦେଇ ସେ କହିଛନ୍ତି ଯେ, ଦକ୍ଷିଣ ଭାରତର ରାଜ୍ୟଗୁଡ଼ିକ ଏହି ପ୍ରସଙ୍ଗରେ ବହୁ ବର୍ଷ ଧରି ଲଢ଼େଇ କରୁଛନ୍ତି । ସେମାନଙ୍କର ଲଢ଼େଇ ହିନ୍ଦୀ ଭାଷା ବିରୋଧରେ, କିନ୍ତୁ ମହାରାଷ୍ଟ୍ରରେ ଚାଲିଥିବା ଲଢ଼େଇର ଉଦ୍ଦେଶ୍ୟ ଭିନ୍ନ ।
ସେ କହିଛନ୍ତି, ‘ମୁଁ ହିନ୍ଦୀ କହେ, ପଢ଼େ ଏବଂ ଚିନ୍ତା କରେ । ଏଠାରେ ହିନ୍ଦୀ ଉପରେ କୌଣସି ପ୍ରତିବନ୍ଧକ ନାହିଁ । ଆମର ମତ ହେଉଛି ପ୍ରାଥମିକ ବିଦ୍ୟାଳୟରେ ହିନ୍ଦୀ ଭାଷା ବାଧ୍ୟାତାମୂଳକ ହେବା ଅନୁଚିତ । ଆମେ ତାହା ହେବାକୁ ଦେବୁ ନାହିଁ ଏବଂ ଆମର ଲଢ଼େଇ କେବଳ ଏତିକିରେ ସୀମିତ।’ ସେ ଆହୁରି କହିଛନ୍ତି ଯେ, ତାମିଲନାଡୁ ମୁଖ୍ୟମନ୍ତ୍ରୀ ଷ୍ଟାଲିନ ମହାରାଷ୍ଟ୍ରରେ ଆମର ରାଲିରୁ ପ୍ରେରଣା ନେବା ବିଷୟରେ କହିଛନ୍ତି, କିନ୍ତୁ ଏଠାରେ ପରିସ୍ଥିତି ଭିନ୍ନ । ସେ ସ୍ପଷ୍ଟ ଭାବରେ କହିଛନ୍ତି ଯେ, ମହାରାଷ୍ଟ୍ରରେ ହିନ୍ଦୀ ଫିଲ୍ମ ଥିଏଟର ଚାଲିଥାଏ, ହିନ୍ଦୀ ଗୀତ ବାଜେ ଏବଂ ହିନ୍ଦୀ ଖବରକାଗଜ ମଧ୍ୟ ଛପାଯାଏ । ଏହାର ଅର୍ଥ ମହାରାଷ୍ଟ୍ରରେ ହିନ୍ଦୀକୁ କୌଣସି ବିରୋଧ ନାହିଁ ।
VIDEO | Mumbai: On Tamil Nadu CM MK Stalin, Shiv Sena (UBT) leader Sanjay Raut says, “The south states have been fighting on this issue for years. Their motive is not to let Hindi get imposed on them, but our motive is different. We speak in Hindi. I speak in Hindi, I read, and… pic.twitter.com/USHFl8vx3v
— Press Trust of India (@PTI_News) July 6, 2025
ଶିବସେନା (UBT) ନେତା ଏହା ମଧ୍ୟ କହିଛନ୍ତି ଯେ, ପ୍ରଥମ ଶ୍ରେଣୀରୁ ସ୍କୁଲରେ ହିନ୍ଦୀକୁ ତୃତୀୟ ଭାଷା ଭାବରେ ଲାଗୁ କରିବାର ନିଷ୍ପତ୍ତି ବିରୋଧରେ ମହାରାଷ୍ଟ୍ରର ଲଢ଼େଇ । ଏହା ଆମର ମାତୃଭାଷା ମରାଠୀ ପ୍ରତି ଅନ୍ୟାୟ। ସେ ସ୍ପଷ୍ଟ କରି କହିଛନ୍ତି, ‘ଆମେ ମରାଠୀକୁ ଦମନ କରିବାକୁ ଦେବୁ ନାହିଁ, କିନ୍ତୁ ଏହାର ଅର୍ଥ ନୁହେଁ ଯେ ଆମେ ହିନ୍ଦୀକୁ ବିରୋଧ କରୁଛୁ ।’
